مقالات اجتماعية : لعنة الفرانكو

مقالات اجتماعية
مقالات اجتماعية : لعنة الفرانكو

انا حلم حياتى انى اقابل 3 شخصيات وهما الراجل الى اخترع  فنجان القهوة عشان اوطى على رجله ابوسها بسبب اختراعه الجبار دة الى من غيره كان زمانى نايمة ومسقطة العمر كله والست الى اخترعت اكلة الملوخية عشان اعرف جابت الدماغ المتكلفة دى منين وطلعت الاكلة الجبارة دى ازاى والشخص الرذل الغتيت الى اخترع الفرانكو عشان اضربوا ستين قفا على سهوة بجد نفسى افهم هو كان ايه غرضه من ان الناس تكتب كلام شبه التعويذات يجب حول و يخلى الى بيقراه يحس ان الى بيكتب ساحر وعايز يسخطه قرد طيب انت واحد معقد واضح ان انت كنت تعليم مجانى وكانت ميس ميرفت بتديك انجلش وبتخليك تقول فيرى ماتش وسانك يو و الشاكت و فيستور ،فطلعت حد معقد نفسك تتكلم انجليزى ومش عارف فلقيت الحل انك تمشى على نهج ميس ميرفت بس بطريقة تانية فاخترعتلنا الفرانكو دة الى ولا منه انجليزى ولا منه عربى ولا منه شوية حساب وارقام طيب احنا ذنب اهلينا ايه بعقدك وكلاكيعك مش عارف تكتب انجليزى ماله العربى يا سيدى ما هو زى الفل بس فى الاخر العيب مش عليك العيب على الجموع العريضة الى اعجبت بفكرتك الجبارة ولغتلك الى مش مفهوملها ومشيت وراك ولبستها لعنة الفرانكو، اصل اوعى تفتكر نفسك انك لما تكتب فرانكو هتبقى الواد ابن الناس الكيوت خريج مدارس اللغات الى كل سنة بتروح تصيف فى باريس لا ابسلوتلى دة كدة انت حد جاهل باللغة الانجليزية وبتهينها واى حد انجليزى او امريكانى او حتى مزاريطى شاف الفرانكو بتاعك هيشرشحلك ومش بعيد يرفع عليك قضية لانك كدة انتهكت اللغة الانجليزية ومحترمتهاش الى هى مقدسة بالنسبة له وفى نفس الوقت انت مستعر من لغة بلدك وشايف انها مش كافية انك تعبر عن نفسك بيها فبتنتهكها ومش بتحترمها برضه، فبدل كل كم الجرايم الى انت ارتكبتها فى حق اللغات وفى حقنا وفى حق نفسك روح اتعالج من كلاكيع وعقد الطفولة وخد كورس انجليزى او حتى جيب شرايط كيف تتعلم الانجليزية بدون معلم وارحمنا من لعنة الفرانكو الى حلت علينا دى .

كتبت بواسطة

سلمى هلال

 هذه واحدة من مجموعة مقالات اجتماعية هادفة اذا اردت المزيد اضغط على مقالات اجتماعية